Fino la primavera y el branu y con ellos los meses más afayaizos pa facer macros a insectos y plantes. Aunque l’oxetivu macru nun se va a guardar del too, por qu’enxamás se sabe onde pues atopar una bona semeya, paez que la climatoloxía va llevanos a tirar d’angular y dedicanos al landscape (que queda más guapo que facer paisaxe). Ye una pena que l’asuntu llaboral y les demás aficiones, nun dexen dedicar tol tiempu qu’esto de retratar merez, que ye asgaya. Pero poco a poco dirán saliendo cosines, con mayor o menor aciertu, pero siempres poniendo’l entretenimientu como oxetivu cimeru.

A pesar de la escasez de semeyes, pude atopar dalgún bichu dignu de ser retratáu como esti insectu palu d’arriba, el primeru que ví na mio vida, posáu nuna flor de datura stramonium, nel conceyu Villaviciosa. El d’arriba del too nun sé como se llama. Yera como una especie de griespa, pero en xigante, con unes dimensiones qu’enxamás había visto. La fotografía macro ye perinteresante, por que al fechu de “cazar” la presa, añádese el cuidala, esperala, conocela, estudiala y buscala al más puru estilu safari de Kenia, aunque tes nun práu de Llangréu. Lo peor de too ye que  los resultaos suelen ser bastante desagradecíos y poques semeyes se puen salvar al final de xornada. Pero lo dicho, el casu ye entretenese.

Flickr ye una ferramienta de yahoo, pa l’almacenamientu, hospedaxe y visualización de semeyes na rede. Al tar usao por muncha xente, hay muncha interrelación ente los diferentes usuarios, gracies a los comentarios que se puen facer en cada semeya y a los grupos a los que se puen amestar les semeyes. Hai una gran bayura de grupos, rellacionaos, con estilos, llugares, sensaciones y tolo que nos pueda venir a la tiesta. Como nun podía ser d’otra manera, hai un grupu de les cuenques mineres asturianes, que pon imaxe a esti peculiar conceutu d’entornu y coloca a les cuenques nel mapamundi de la rede, al traviés de les semeyes y güeyos de la xente. El grupu ta formáu por más de 100 persones y ya tien subíes más de 1000 semeyes. Ente eses mil, acaba de facese una expo, esbillando 18 que pretenden ser de les más representatives, aunque de xuru, que munches quedaron pol camín.

Podeis ver la expo pinchando equí.

Fai unos díes falé equí, d’una ferramienta que me habíen enseñao pa poder facer la to páxina web de baldre. Dende myegoo.com pues facer un sitiu web pa tener la to gallería fotográfica con una pinta más profesional que les típiques galleríes tipu Flickr. Entamé a escaciplar con ello y fice la mio páxina la espera d’echar una migaya más de tiempu en meyorar el diseñu. Ta pensao más que na pa enseñar les semeyes a xente conocío, que nun tan de restolar pola rede y piérdense con facilidá. En resumen, paez una bona oportunidá de tener ordenaes y en un sitiu visible pa tol mundu, les semeyes de los aficionaos a la fotografía, aunque tamién se puen facer páxines con otres finalidaes.

Equí ta lo que ye primer web fecha coles mios semeyes. Como si fuera un fotógrafu de verdá. Si quereis echar un güeyu, la dirección ye:

http://www.tinseoane.mye.name/

La revista dixital de fotografía foto DNG, espubliza una esbilla de semeyes, de los integrantes del grupu de Flickr, A vista de objetivo. Esta ye una iniciativa d’AntonioJ que por fín güei vió la lluz. Tar nel sitiu adecuáu, nel momento adecuáu fizo que una semeya mía forme parte d’esti reportaxe, lo que me presta asgaya, por que ye la primer vegada que se espubliza una semeya mía nuna revista de fotografía.

La revista pue vese y descargase  nesti enllaz.

Cuando sales a facer semeyes a sitios o a plantes y animales, préstame saber que ye lo que toi retratando. Si toi nel extranxeru, préstame conocer el nome del pueblu, monte, ciudá, fastera o biesca. Si retrato una florina préstame saber como se llama y como la noma popularmente la xente, si saco una semeya a un animal, paezme perimportante conocer el so nome y dalguna carauterística d’él. Esto nun siempres ye posible por mor de la mio incultura en dellos temes y de la dificultá que teo n’algamar determinaes búsquedes restolando pola rede.

Préstame ver blogues de naturaleza como’l de La Ría de la Villa onde nomen a toles especies col so nome científicu, el nome en castellau y el nome n’asturianu. Yo, a vegaes pido ayuda a xente conocío pa ver si puedo algamar información sobre’l retratu en cuestión y delles veces funciona.

Nel casu d’esta semeya y según la información que me apurrió Jesús, un compañeru de trabayu (gracies a la so prima), en xeneral, a los curculiónidos nómase-yos gorgojos o picudos, y son plagues de vexetales. Esti paez ser una plaga de los pinos: les femes ponen los güevos baxu la corteza, y les llarves dedíquense a xintar, faciendo camininos pola maera. Esti en concretu, ye maliayu, de la parroquia de Tornón.

Esta ye la semeya d’una semeya. Cuando te presta facer semeyes, acoples esa afición a les coses que te rodeen o a los vezos que ya teníes. Lo bono ye garrar aficiones que se puedan complementar y que nun faigan como l’aceite y l’agua. A vegaes, salen coses prestoses d’eses xuntances que, inclusu puen facer esos vezos más interesantes entá o da-yos un puxu importante.

Préstame facer semeyes pero eso nun va más allá de la vanidá que te pue dar al enseñales pola rede a xente que nun conoces. Enxamás se fizo na colos mios retratos más que mandar un par d’elles a dos concursos, onde pasaron con más pena que gloria y sufrir un par de robos cibernéticos por xente que tien tanta prisa que nun pue perder 30 segundos en mandar un corréu pidiendo permisu. Esto casi ye lo mesmo que dicen los porretas cuando los para la policía, “ye pa consumu propiu”. Dende fai unos díes hai una exposición permanente d’indumentaria y etnografía, na rehabilitada casa los Alberti de Ciañu que ta fecha y entamada pola Agrupación d’Etnografía y Folclor “Reija” de Llangréu. A vegaes faigo retratos pa la xente de Reija y préstame que hayan esbillao una semeya mía pa la exposición. Amás,  paezme que se fizo un bon trabayu cola maquetación y los cartelos. Esperemos que la xente lo visite y que la mio semeyina de la talla. Nun ye la más guapa que fice nin la más correuta, pero ye la primera que ta a la vista de xente normal nun entornu seriu.

Un saltapraos, namás vive ente 9 y 11 selmanes, mide de 1,5 a 2 centímetros, tien ales y pue esnalar. Tien los muerganos del oíu asitiaos nos llaterales del segmentu anterior del abdomen, adáptase perbien al mediu onde ta  polo que pue tomar el collor del entornu, normalmente de tonos marrones ocres y grises, aunque tamien se puen ver con collores más llamativos.

Esti en concretu ye llangreanu y vive (o vivía, quien sabe…) nel míticu práu de Castandiellu. Atopelu, caleyando pol práu a la gueta de dalgun macro, pero el posaeru onde taba nun yera el más afayaizu, asina como la so posición. Intenté garralu y cada vegada que me acercaba, saltaba. Siguilu, hasta que paeció que tenía menos enerxía y acusaba’l cansanciu. Dexome garralu, por agotamientu y puselu nel posaderu que a mí me interesaba. Tornó a saltar y repetí la maniobra por tres veces, hasta que quedó quietu y me dexó face-y los retratos que me petara. Asina, colé pal mio llar contentu coles semeyes y el saltapraos quedó nel so práu de Castandiellu.

Los modelos más agradecíos na fotografía macro son les flores. Agora tamos nuna época del añu perbona pa pidi-yos permisu y algamar face-yos una sesión de retratos, como a una moza egocéntrica que se dexa fotografiar cola esperanza de salir guapa, aunque seya un trabayu complicáu asgaya.

La humedá del terrenu y l’altura de les flores suel ser un problema a la hora d’encuadrar y disparar. Como la mayoría de les flores suelen tar a ras de suelu hai que tirase a tierra o polo menos posar una rodilla, cola pinga correspondiente que vien asociada. La poca estabilidá, por culpa d’estes postures acrobátiques, complica que’l resultáu salga nítidu, cuando tamos falando d’una fotografía que suel tener una focal media-llarga, una profundidá de campu curtia y un tiempu d’exposición mediu-llargu pa poder tener lluz, poro, cualquier mínimu movimientu pué repercutir negativamente nel resultáu final.

Lo bono ye que nun hai que buscar muncho p’atopar dalguna florina digna de retratar. Aunque nun salgas del entornu urbanu, siempres hai un parque o un xardín onde poder entrenate. De mano salen subexpuestes, trepidaes, o col focu nel llugar equivocáu, pero nun ye más que cuestión de tiempu l’algamar una que paezca correutamente fecha, aunque pa munchos nun seya más qu’una semeya d’una flor.

L’otru día fuí al área recreativa de La Campa l’Abeduriu, nel conceyu Samartín del Rei Aureliu, pa ver si me facía col enfoque del oxetivu macro. En principiu conformábame con atopar una florina guapa y que polo menos la semeya tuviera nítida. Dime cuenta que pa munches semeyes había que tirase al suelu o polo menos, apoyar la rodilla, lo que yera un problema, por que al ser pola mañána, el práu taba pingando.

Había lleío que pola mañana, los insectos taben más inactivos, esperando que-yos diera el sol pa entamar la so actividá. Atopé dalguna mosca, pero en xeneral nun ví nada interesante. Supongo que será una d’eses coses que si nun les busques, de xuru que lo atopes con más facilidá, pero basta que vayas a la caza de dalgún insectu pa que nun atopes na.

A última hora avereme a unos árboles que taben en flor. Segun me dixo la xente, podíen ser nisos o ciruelos y la verdá ye que taben apestaos de florines blanques. La idea yera retratar les flores, pero sentí un zumbíu y dime cuenta que taba enlleno abeyes garrando’l nectar. Costome muncho sacales a focu, por que les más baxes taben a dos metros diez del suelu, más o menos y yera bastante incómodo andar detrás de les abeyes colos brazos n’altu. Entamé intentado enfocar en manual, pero yera práuticamente imposible. Lluéu camudé el focu al modu “Al Servo” y foi cuando algamé los meyores resultaos. La verdá ye que la mañana diose meyor de lo qu’esperaba.

Ya tenía decidío que tenía que faceme con un oxetivu macro. Un nuevu güeyu pa la colección que me dexe ver la rialidá de forma diferente. Dempués d’entrugar a los que saben, decidí mercar el Canon EF 100 f/2.8 USM Macro. Yera la primer vegada que mercaba pola rede y la verdá ye que tenía un poco miéu. La diferencia coles tiendes asturianes yera de 100 euros, pero la verdá ye que tenía conocíos que habíen mercao a tiendes de Hong Kong on-line y la cosa salió bien. Básicamente, un oxetivu macro ye un xuguete que te pue entretener abondo y salvar munches salides fotográfiques poco afortunaes, por mala llocalización o lluz. Tras la examinación física de rigor al llegar a casa y aunque ye un oxetivu que ta direutamente lligáu a la naturaleza, namás tenelu na mano, entames a buscar la fauna y flora que tienes por casa como si fueras Félix Rodriguez de la Fuente. Esta semeya ye la preba.

Llevaba ya tiempu queriendo probar con tranquilidá un oxetivu macro, aunque la verdá ye que ya tenía decidío mercalu enantes d’esta sesión. La mio collacia Silvia Martín tien el macro 100 mm de Canon que ye’l modelu que me habíen recomendao xunto col Tamron 90 mm. Dixéronme que los dos dan bonos resultaos y el Tamron ye bastante más baratu, aunque la calidá de Canon  ta un poco por enriba.

Aproveché que tenía coses que facer cerca y tiré hasta’l parque a la gueta de dalguna florina y si tenía suerte dalgun bichín. De mano nun ví nada, amás les coses que podíen retratase, taben llóxicamente a ras de suelu, polo que yera necesario tirase al suelu pa encuadrar y algamar meter la florina a focu. Teniendo en cuenta que yera un parque públicu y que’l práu taba roxáu por ser pola mañana, la dificultá d’esti tipu de fotografía, yera importante.

Metime a l’asuntu y dime cuenta que’l primer problema, dempués d’esbillar l’oxetu a retratar, yera conseguir el focu onde tú quiés y non onde decide la cámara. Hai que tener bon pulsu, apnea, midir bien la lluz y intentar nun movese, por que aunque metas el focu nel sitiu que te interesa, si te mueves un milímetru, ya camuda too. Yera la primer vegada qu’enfocaba en manual y paeciome bastante complicao.

Ya había retratao delles florines, aunque hasta que nun llegara a casa, nun diba a saber si taben rialmente nítides, cosa bien importante en tolos tipos de fotografía, pero nesta sobremanera. Dende’l entamu busqué dalgun animalín, aunque’l sol ya restayaba asgaya y dixéronme que la meyor hora p’algamar retratar insectos y qu’ellos te dexen, ye enantes de que caliente’l día, por que tan más alletargaos y dexen que te acerques más. Pensé que diba ser misión imposible por que nun veía na y colo que me taba costando enfocar les flores, como pa intentalo con un bichu asustadizu enriba la flor. Siguía mirando pal suelu, hasta que ví una flor d’un diente de lleón con una mancha negra. Acerqueme y ví que yera una abeya garrando tol nectar que podía. Acerqueme con miéu, pa que nun colara y pude dispara-y 4 semeyes enantes de qu’esnalara lloñe. La única que quedó más o menos a focu, foi esta, aunque te de culu…

Dempués de xintar abondo teníamos delles llocalizaciones pa dir a retratar. Pero teniendo en cuenta que nesa época del añu la lluz marcha sobre les seis de la tarde, decidimos dir direutamente al Nitrógeno, por miéu a que nun nos diera tiempu más tarde y la verdá ye que acertamos.

El complexu industrial de Nitrastur ta asitiáu ente les víes de la Renfe y el cauce del Ríu Candín ente La Felguera y Barros. Angüañu ta abandonao aunque hai un guarda qu’entra dos vegaes al día. Dientro atópase la típica imaxe de decadencia industrial bastante lligada a la cuenca. Yo véolo como un gran plató de cine onde pues atopar carreteres desiertes, almacenes xigantes, tolves, cases, una torre refrixeración, llaboratorios, vestuarios y un sinfín d’ayalgues a la hora de garrar imáxenes o utilizalo d’entornu pa una hestoria de ficción.

La fábrica d’amoniacu sintéticu de la Sociedad Ibérica del Nitrógeno, lluéu Unión de Explosivos Riotinto y Nitrastur, foi la primer factoría llangreana especializada exclusivamente en actividaes químiques derivaes del carbón. Instalose en Vega ente 1923 y 1925 xunto a les instalaciones de Duro Felguera que-y había cedío los terrenos y de la que aprovechaba los gases procedentes de los fornos de coque. Col establecimientu del plan del Nitróxenu, nos años cuarenta pol que se potenciaba el consumu de nitróxenu de fabricación nacional y favorecíase a les empreses que se dedicaben a la so producción, la factoría decide ampliar les sos instalaciones, polo que se tresllada a la vega de Barros. Les obres de la nueva fábrica entamaron en mayu de 1950 y finaron n’ochobre de 1954.

Les marquesines y almacenes adopten curioses formes abovedaes, asina como la torre de refrixeración, similar al qu’alberga el MUSI. Talleres, varios hoteles pa inxenieros, almacenes de proporciones descomunales, etc. Incluyose nel Rexistru Industrial del DOCOMOMO (Organización pa la Documentación y Conservación del Movimientu Modernu) como una de les 20 meyores muestres d’arquitectura industrial moderna d’Asturies. Esta foi la primera sociedá que fabricó n’España sulfatu amónicu. Actualmente preténdese arreglar esta fastera col proyectu “Llangreu Norte”, presentáu en mayu de 2007 (aunque dende esa fecha nun se faló más del tema…). Esti incluye un parque tecnolóxicu, zones d’ociu y recréu, y la expansión natural del cascu urbanu de La Felguera por esti territoriu. Pola importancia de l’arquitectura industrial d’esti complexu, algunos de los edificios van ser respetaos y restauraos p’albergar algunos d’esos servicios del parque tecnolóxicu.

El sitiu tien munches posibilidaes fotográficamente falando, amás tien l’añadíu que, como nunos años van tiralo too y lo que quede va tar transformao abondo, les semeyes tienen esi tastu de tar retratando parte de la hestoria d’un pueblu que va desapaecer de delantre los nuesos güeyos y eses semeyes van ser l’únicu testimoniu de lo qu’existió dalgun día. El blancu y negru ye casi obligatoriu.

Resultome bastante complicao componer por que hai muncha maleza y aislar les coses y edificios ye bastante complicao. Dime cuenta que había munchos detalles piquiñinos que tamién yeren interesantes. Sobre too imaxinábame’l sitiu como un entornu peramañosu pa rodar un curtiumetraxe del tipu “post estallíu nuclear” aunque tamién tien bona pinta pa facer una sesión de retratos con un estilismu cuidáu o buscando un ambiente fantasmagóricu.

Pinchando equí y equí podeis ver los sitios onde atopé la información. Si la quereis ampliar, nun dudar en pinchar. Y si decidís dir, tener cuidáu, davos prisa enantes que lo tiren y suerte cola inspiración.

Fai unos díes ficimos una kdd caborian en La Felguera. Tenía gana de ver lo que yera esa xente capaz de facer nun entornu que yo teo pertrilláu y cuéstame ser orixinal. La verdá ye que nun defraudaron, ficimos semeyes asgaya y dalgunu consiguió dalgun retratu curiosu. Pasamos un día entreteníu alrodiu la fotografía y la gastronomía, que suelen facer bona mecigaya. En primer llugar tiramos pa Valnalón.

Nun polígonu industrial hai naves, edificios, cais desiertes, ta el orixinal Musi, pero tamién dellos detalles en fachaes y muries, aunque al ser tempranín, la lluz nun acompañaba. El sitiu pue tener munches posiblidaes si se tien bona vista.

Lluéu, aprovechamos que taba cerquina y tiramos pa’l Barriu Urquijo, un sitiu con poca xente onde tamién se puen facer cosines interesanes si se ta inspiráu. Dalgunu se asomó a la ventana quedando ablucáu al ver tantu “reporteru de guerra”.

Foi curioso que nel barriu, nun saqué na urbano, arquitectónico nin industrial y viendo les mios semeyes, más bien paez que tuve nel parque de Redes. Será’l refalfiu de ver chimenees y fábriques a diario.  Nesti sitiu, los teles de la xente dieron bonos resultaos.

De ehí fuimos pola Pomar en direición al Parque Nuevu, onde esperaba que la xente ficiera daqué de fauna, social y cosines asina, pero dellos decidieron tirar pal chigre (más social nun lo hai…). Los que quedamos pol parque camudamos de xeitu y dedicámonos al macru, un estilu fotográficu que ye bien prestosu y entreteníu, onde espero afondar nel futuru.

Ya llegaba la hora xintar asina que tiramos pal chigre onde habíamos reservao y nes 2 hores y media siguientes, les cámares tuvieron guardaes nes bolses.

Estambul, (en turcu İstanbul), ye la ciudá más grande de Turquía, y una de les más poblaes d’Europa. El cascu vieyu de la ciudá ta mayoritariamente na oriella europea del Estrechu del Bósforo, si bien anguaño la ciudá espárdese pola oriella asiática. Anguaño, Estambul ye la capital cultural, económica y industrial de Turquía, si bien la capitalidá alministrativa afitóse en 1923 n’Ankara. Ente otros aspeutos, Estambul ye ún de los centros cabezaleros d’industria textil d’Europa, un centru portuariu estratéxicu, y el primer destín turísticu del país. Amás, caltién una docena d’universidáes y ye la sé del Patriarcáu Ecuménicu de Constantinopla, cabeza de la Ilesia Ortodoxa Griega. A nivel turísticu ye una ciudá interesante asgaya, igual que nel aspeutu fotográficu. Da igual el tiempu que pases n’Istanbul, siempres tienes la sensación de que te queden coses ensin ver.

La mecigaya de mestizaxe ye brutal, lo de la puerte d’Asia, nun ye sólo un slogan, el tastu musulmán, los golores, la xente, les mezquites faen un conxuntu de coses que te recuerden a cada vistazu que tas nun sitiu estremáu y especial. Apetez pasar díes y díes ellí cámara en mano, robando toles imáxenes que la ciudá ufierta. Nun viaxe curtiu, dexes muncho ensin retratar y faes lo posible por traer tolos recuerdos que puedas, como’l que dispara a una bandá de gurriones. Ente la curtia esbilla que fice llamome l’atención la estación de la cabera llegada del Orient Express, un sitiu enllenu lleenda.

La ciudá tenía mil cares, dende la más racial y etnográfica a la más cosmopolita. Con cada disparu robábase una migaya d’esa belleza misteriosa. La lluz, el collor too indicaba que tabes nel centru del mundu y lloñe de cualesquier lláu. Na semeya d’abaxo pue vese la Torre Gálata, un bon sitiu pa ver el tapecer sobre la ciudá.

L’enigma del mundiu islámicu fízome pensar muncho. Non por ser especial sinon, por ser estremáu a lo que vemos nel día a día y por ser la primer vegada que pisaba un país que, aunque se declara llaicu, emana islamismu en cada requexu. Los minaretes, les mezquites y el ramadán daben bona cuenta d’ello.

Ya tenía gana d’intentar facer un barríu cola cámara. Fai unos meses aproveché les fiestes d’un pueblu del Conceyu Villaviciosa onde había una carrera de cintes a caballu. Monté el 70-300 mm y púseme lo bastante lloñe como pa nun dar la nota. Entame tirando a  1/15 seg., fice varies y toes me salieron como esta o peor. El fondu taba movíu col efeutu que quería, pero’l xinete y el caballu tamién.

Cuando ya lo diba a dar por imposible, pensando que nun facía bien el movimientu, diome por camudar la velocidá d’exposición a 1/40 y tiré la cabera de la serie. Al llegar a casa y mirar el resultáu dime cuenta que había acertao de milagru na última semeya. Lo bono ye que dime cuenta que nun ye una técnica imposible, ye visualmente atractiva y, aunque tenga que pulise, puen llegar a algamase bonos resultaos.

La nitidez ye un tema perinportante, xunto cola profundidá de campu. Cola abertura del diafragama, controles hasta onde quies el focu, dando más o menos profundidá de campu y aislando coses gracies al desenfoque selectivu, pero pa conseguir una nitidez bona, intervienen demasiaos factores. Amás de la calidá de la llente, ta’l pulsu del fotógrafu xuníu a la velocidá d’obturación, que a la vez depende de la lluz qu’haya y de la lluminosidá del oxetivu. Lluéu ta’l procesáu con máscara d’enfoque y demás, que munches vegaes termina por estropiar la imaxe y el tema de subila a la rede onde la nitidez queda pol camín en munchos casos, aunque uses la opción “guardar para web”. Cuando consigues una semeya que tien la nitidez que imaxinaste a la hora de disparar, entá nun sé si tolos ellementos qu’intervienen se pusieron al to favor por pericia del fotógrafu o si ye cuestión de simple suerte. El casu ye que aunque se intente casi siempres, sólo de vez en cuando sal.

Acaben de terminar les fieste de San Pedru y aproveché una salida del Grupu Reija pa estrenar el canon 70-300 mm que merqué fai pocos díes. L’entornu nun yera’l más prestosu, asina que zarré’l encuadre y intenté facer dalgun retratu, esi estilu fotográficu nel que toi más perdíu que la hostia (agora que lo pienso, como en tolos demás estilos, o quiciavis más…). La verdá ye que’l teleoxetivu ye una gozada y tien unes posibilidaes tremendes. Espero poder aprovechalu bien nel futuru y da-y sentíu al desembolsu de perres. Los traxes y les cares pedíenme blancu y negru.

Ta tola serie nel enllaz: http://www.flickr.com/photos/reija/

Estes son dalgunes de les semeyes que retraté durante’l  4ºCongresu Caborian. Al llegar a casa dime cuenta que había fecho munches menos semeyes de les que pensaba. Había un retu durante’l congresu, que trataba de sacar el meyor retratu… yo nun fice nengunu. El verdaderu valir, d’esos tres díes taba nes rellaciones personales, l’aprendizaxe y en compartir lo que tienes, colos demás. Curiosamente, les tres son en blancu y negru…

La primera ta fecha en El Puntal, conceyu Villaviciosa. 

La segunda dende’l puertu de Tazones.

Y esta última, ente los pasiellos de La Llaboral, aprovechando un rayín de lluz que se colaba por un ventanu.

El domingu pola mañana respirábase nel pueblu esi ambiente de nerviosismu y movimientu coleutivu que daba a entender qu’ún d’esos acontecimentos, que pasaben cada munchu tiempu, diba a visitar a los vecinos. Yera un pueblín pequeñu, nel que nun pasaben coses demasiao importantes, pa bien o pa mal, asina que la culminación de l’incidente del robu na ilesia yera daqué que diba a servir p’alimentar les conversaciones de la xente durante dellos díes y pocos queríen quedar ensin velo. Por eso mesmo, a la hora de la misa casi tol pueblu caleyaba en comuña, camín de la ilesia. La satisfación del cura yera direutamente proporcional a l’asistencia de públicu y gozaba al ver la ilesia enllena, aunque fuera namai pol morbu de ver el resultáu final del trabayu del que se llevaba falando tol mes. Ente los asistentes, taba Minio, el paisanu vieyu que había “donao” la maera pa que sirviera de cuerpu a la imaxe del santu que se diba a venerar naquel pueblu. El cura dixo la misa y al finar puso la talla enrriba l’altar pa que toos la pudieran ver, al tiempu que falaba de la necesidá de sacala en procesión y festexar el día del so santu en virtú de los milagros qu’había fecho nel pasáu. Al llegar a esti puntu y ante l’asombru de toos, Minino llevantose del so asientu apoyándose nel cayáu y llevando una mano a la güevera, dixo estes pallabres, que nun se ma van escaecer mentres viva: “Na mio güerta te criaste, cerezal te conocí, los milagros que tú faigas, me los paso por aquí”.

Fin.

A última hora de la tarde, el carpinteru salió a la puerta del so taller y vió como dellos vecinos se diben averando, pol camín qu’entraba na plaza po’l lláu la fonte. Llevaven tres carretillos con un troncu cada ún, recuerdu caberu del cadaver, de lo que foi un frutal altu y vieyu. El carpinteru fízo-yos sitiu na esquina de la esquierda’l taller, onde tenía más maera que ya enxamás trabayaría, pa que pudieran bascular la carga. A partir d’esi día, les manes del carpinteru entamaron a escaecer el propiu escaezu llaboral y nun tardaron en amigase coles ferramientes, coles que llevaben años ensin tener tratu, y en dexar la preba d’ello nos surcos de la maera. Tomó el trabayu con calma. Prestando-y cada vegada que la xente lu paraba pa entruga-y y sintiendo que toos taben pendientes d’una creación suya que diba a quedar lligada al nome del llugar pal restu la hestoria. El cura tamíén pasaba de xemes en cuando pola so casa pa ver como diba el trabayu, pero en nengún momentu intentó mete-y prisa o apuralu, por que sabía que’l pueblu enteru taba pendiente de que llegara el día que la ilesia se abriera a tolos vecinos pa mostrar la nueva talla del santu y cuanto más tardara, más interés y espectación diba a crear ente la xente. Tardó un mes en finar la talla’l santu.

Yo nun sabía por qué, pero los paisanos entendíos del pueblu, entamaron a pensar d’onde podíen sacar un troncu bonu de cerezal, asina que quise entender que yera una de les meyores maeres pa un trabayu como esti. Mientres cada ún daba la so idea, yo acordeme que Minio’l paisanu vieyu, tenía una cerezalona na so güerta que-y estorbaba por culpa los raigones y que ya me había contao delles vegades que si él tuviera venti años menos, tiraba de motosierra y nun-y duraba un asaltu. Comente-yos esto al conceyu de paisanos que discutien glayando unos per enriba d’otros como si la credibilidá tuviera direutamente relacionada col volumen de la pallabra. Chocome bastante que me ficieran casu, ya que la opinión d’un mozu enxamás ye tan valoratible como la d’un paisano, pero al poco de conta-yos la mi idea, tábamos toos caleyando col cura a la tiesta pa dir a buscar a Minio que pa esa hora de la mañana, ya había dao por más que vistu l’incidente del robu y taba cuantayá trabayando na so güerta. Al llegar a la portiella pola qu’el paisano entraba tolos díes na so finca, el cura dio-y una voz pa que  s’averara y poder falar con él.

Como en tolos llaos hai xente estremada abondo, nun tardaron en xorrecer les voces qu’animaben a los demás a dexar de quexase y a entamar a iguar lo qu’entavía tenía arreglu. Taba perclaro que la ilesia nun podía tar ensin santu, asina qu’aunque tolos vecinos llamentaben asgaya qu’hubieren robao la tradicional imaxe, unos pol valor relixosu y otros pol valor hestóricu, darréu vino a les tiestes de toos el nome d’Antón, que yera’l carpinteru del pueblu, aunque xusto enantes de xubilase, había xurao qu’enxamás garraría un tablón nin un tucu maera en lo que-y quedaba de vida. Yera tal la gravedá del acontecimientu qu’había revolucionao esa mañana al pueblu enteru qu’Antón nun tardó muncho n’aceptar l’encargu, por que-y daba vergoña negase a facer un trabayu del que taba tola xente pendiente y por que yera una forma de pasar a la hestoria del pueblín que lu había visto nacer (satisfaciendo asina bona parte del so escaecíu ego) y nel qu’esperaba dalgún día, lo más llonxanu posible, morrer como ficieron su pá y su má. La única condición que puso el carpinteru, foi que-y dieran la maera, por que la mano d’obra, les ferramientes y l’artesanía yera cosa d’él.