Bakaður bláberjagrautur

1 skammtur

40g haframjöl*
2 dl vatn
2 eggjahvítur
1/2 tsk lyftiduft
klípa sjávarsalt
dass af kanil
1 tappi vanilludropar
70-100 g bláber * (geyma nokkur til að punta grautinn eftir eldun)

* magn fer eftir þörf hvers og eins

Aðferðin er aumingavæn út fyrir allan þjófabálk: Allt sett saman í ofnfast mót og bakað í 30 mín á 170°C

Skreyta með nokkrum bláberjum og drizzla Walden Farms sykurlausu pönnukökusírópi yfir gúmmulaðið.

P.S Búðu þig undir alvarlegan þátíðarátskvíða…. you’ve been warned.

Atvinnumennska krefst prófessjónal græju til að ferja fóðrið milli staða.

Þessi taska er Ferrari þegar kemur að transporti á snæðingum fyrir langan vinnudag. Þrjár hæðir fyrir nestisbox, hliðarhólf fyrir vatnsflösku, shake brúsa, hólf fyrir vítamín, hnetur/möndlur, hnetusmjör, prótínduft eða hvað annað sem á að renna niður kokið.

Ef þú ert með skipulagið niðurneglt tekur ekki nema örfáar mínútur að henda í hollt og staðgott nesti. Með ísskápinn troðinn af soðnum grjónum, couscous, byggi, bulgur, kartöflum, steiktu hakk, kalkún, kjúklingi, bökuðum lax, eggjahvítupönnsum verður nestisgerðin að barnaleik. Að auki, þegar þú gerir þinn eigin mat veistu hvaða innihaldsefni eru í honum og getur fylgst betur með hversu margar varmaeiningar renna niður vélindað.

Kelp núðlur þarf einungis að skola í köldu vatni í örfáar mínútur og þær eru klárar til brúks. Til dæmis með rækjum.

Teriyakilax með kanilkúskús og brokkolí fyllir þig vel upp næstu þrjá tímana.

Sá sem fann upp nestisboxið til vinstri á að fá Nóbelinn, hólf fyrir kjöt, sósu, avocadogums ofan á, lítið box fyrir salatdressingu og stórt hólf undir fyrir salat.

Vefja með hakkgrýtu, káli, agúrkum er gómsætt og súperkvikkt til að dýfa sér ofan í lönsjboxið.

Ávextir, eggjahvítupönnsur, skyr, sykurlaus jógúrt, kotasælubúðingur, hnetusmjör, möndlur, hrökkbrauð, hrískökur, prótínsjeik eru dásamleg millimál meðan setið er á kontórnum.

Njótið vinnudagsins á beinu brautinni með skipulagið í botni og hollustuna í fimmta gír.

Eitt skemmtilegasta “frjálsa” át sem rennur ofan í endalaust svarthol Naglans er sveittur majónesusmurður hammari á helstu hamborgarabúllu København – Halifax. Djúpsteiktir kartöflubátar, majónesu aioli og átta kíló af tómatsósu bíða klár á kantinum að vera slátrað í græðgiskastinu.
En slík sukkveisla af milljón kaloríum myndi fljótt smyrja ansi þykku lagi af sleni á sálina og lýsi á lærin ef snædd oftar en góðu hófi gegnir og því takmörkuð við nokkrum sinnum á bláu tungli.

En maður getur samt notið lífsins lystisemdaán þess að sporðrenna of mörgum einingum til vermingar. Inn kemur hollur Naglavæddur hammari sem gleður sinnið  á hversdagslegum janúardegi.

Hollur hammari og kartöflubátar

1 kvekendi

4% hakk (fæst í Kjöthöllinni)
Season All, sjávarsalt, pipar eða hvaða krydd sem kitlar pinnann
5% ostur
iceberg kál
Sykurlaus tómatsósa (t.d Sollu)/salsa/sinnep/sykurlaus BBQ
5% sýrður rjómi
sneiddir tómatar

heilhveiti hamborgarabrauð

1. Móta litlar bollur úr 100g af hakki. Krydda vel og fletja aðeins út.

2. Steikja borgara í George Foreman grilli í 5-6 mín, á pönnu eða útigrilli í 2-3 mín á hvorri hlið. Undir lokin á steikingu skella 1-2 sneiðum af horuðum osti og leyfa að bráðna… jömms

3. Hita hamborgarabrauð í ofni eða ofan á brauðrist

4. Smyrja brauð með tómatsósu/salsa/sinnepi/sýrðum/bbq

5. Raða á brauðið: kál, gúrka, tómatar, rauðlaukur eða hvaða grænmeti sem gleður sjálfið, ásamt sjálfum borgaranum

Kartöflubátar

Kartöflur skornar í báta

Pam sprey

Pommes Frites krydd/pipar/sjávarsalt

1. Hita ofn í 220 °C

2. Setja kartöflubáta í poka, hella kryddi ofan í pokann og hrista eins og vindurinn.

3. Hella krydduðum kartöflum í ofnskúffu og spreyja með PAM (má sleppa)

4. Baka í 25-30 mínútur eða þar til gylltar og krönsjí að utan. Gott að róta aðeins í kartöflunum 1-2 sinnum meðan þær bakast.

Unaðslegar með nóg af tómatsósu eða horaðri kokteilsósu (sýrður + tómatsósa).

Eggjahvítur eru besti prótíngjafi sem völ er á og eru eins og kameljón því það má breyta þeim í allra kvikinda líki: flöff, pönnsur, lummur, sjeika, ommilettu, marengs,  eggjahvítuís, súkkulaðiköku og ég veit ekki hvað og hvað….

Sítrónulummur

1 skammtur

5 eggjahvítur (150 ml)
1 mæliskeið HUSK eða 1/2 tsk xanthan gum
1 tappi Kötlu sítrónudropar
1/2 tsk lyftiduft

* HUSK og/eða xanthan þykkir deigið þegar ekkert glútein er til staðar til að binda það saman

1. Allt sett í blandara eða hrærivél

2. Hræra í 1-2 mínútur

3. Gumsa 1 matskeið af deigi á heita pönnukökupönnu. Þú getur bakað þrjú til fjögur kvikindi í einu.

4. Þegar bobblur myndast á toppnum skal þeim snúið á rassinn og leyft að dunda sér í 2-3 mínútur. Þú vilt hafa þær bakaðar alveg í gegn en ekki hráar í miðju… það getur verið stemmningsbrjótur.

Dásamlegt með sykurlausri bláberja- eða stikkilsberjasultu.

Þetta unaðslega kombó hefur ekki vætt varirnar síðan á haustmánuðum og ennþá nóg af rabarbarauppskeru sumarsins í frystinum og bragðlaukarnir liggja ennþá í kóma eftir þessa sprengju í munnholinu.

Vanillugrautur með bökuðum rabarbara

1 skammtur

Grautur:

haframjöl

1-2 mæliskeiðar HUSK

klípa salt

1-2 tsk chia fræ

1/2 tsk vanilluduft

Stevia vanilla créme dropar (Nóatún/Blómaval)

Bakaður rabarbari:

6 – 8 stilkar rabbarbari

1 msk Sukrin/Stevia

1 tsk vanilluduft

1. Hita ofn í 200°C

2. Skera rabarbara í 1 cm bita og setja í eldfast mót

Rabbarbari í eldföstu móti

3. Strá sukrin og vanilludufti yfir og blanda vel saman

4. Baka í 15-20 mín eða þar til rabarbarinn er mjúkur

5. Allt hráefni í graut sett í pott með vatni (magn eftir þykktarsmekk) og kokka upp á gamla móðinn

6. Gumsa rabarbara út í þegar grautur er tilbúinn til átu og hræra varlega saman svo bitarnir haldist heilir en maukist ekki í spað. Það er svo mikið fútt að fá heila bita undir tönn.

 Dónalegur Daníel með kanil og Walden Farms pönnuköku sírópi drissluðu (skemmtilegt orð) yfir unaðinn.

Þetta át springur af fortíðarþrá þar sem dísykraður litarefnasósaður rabarbaragrautur skipaði stóran sess í mataræði Naglans á sokkabuxnaárunum.