Tags » Ishigaki

Spearfishing at Kozaki

Suffering the February cold was worth it for this spearfishing trip as I came home with a whole lot of fish!

I was particularly happy with catching my first cuttlefish. 323 more words

Fitness

New year 2018 and traveling Yaeyama, Osaka, Kobe and Hiroshima

Heya guys, I am late in the party, eh? Well I have been traveling a lot the past two weeks, but I will get into that later. 7,909 more words

日本最南與最西端之旅 - Day 5 暫別溫馨島國

五日嘅旅程疾風一樣地到左最後一日,早上食左簡單嘅早餐,領過尋日喺酒店訂嘅最西端証明就要去機場喇。還車之前要先入番滿油,去到酒店出面個油站嘅時候,發現尋日租車俾我地嘅姨姨又係負責入油,小島就係咩都一腳踢。

去到機場其實呢度好細只有一日三班去石垣嘅機,所以一時好多人一時又無晒人。剛好今日有去遊學嘅與那國中學生,好熱鬧。

機場有幾間賣土產嘅商店,我地決定每間店都振興下,買左T裇毛巾呀咁,就要入去等上機了。每一個店員都好落力同我地傾偈,出奇地與那國嘅店好似係用得最多英文單字嘅。其實呢度除左馬,大風同海鹽之外,手織物都係出名嘅,不過搵唔到一樣會用到嘅紀念品,就用張相留念啦。

再見與那國之後,仲有一個半鐘由石垣起飛。不過辦得登機嚟都無時間食野了,而我應該差唔多好番晒, 開始肚餓了。唯有捱到番香港先食啦。

石垣機場好嚴謹,除左液體 (包括忍唔住買多左兩杯食嘅啫喱) 一超過一公升就要寄,手提行李都同你逐個袋磅。結果俾多左三百幾蚊寄艙。。。。

雖然係好短嘅一個旅程,但今次應該係我第一次真係輕鬆去嘅旅行。唔趕行程唔趕車,享受每一件有安排同突發嘅大小事,雖然在疾風中作病嘅兩日瘋狂發呆,但都好感受到小島嘅溫暖-感謝每一個旅途上為我地製造美好回憶嘅商店旅店同食肆員工、租車同巴士公司、島民、香港人、牛馬、雀仔貓仔,仲有不停檢查我個樣有無異樣嘅老友記。當然一個旅程去左咁難去嘅最南同最西端,仲要大部分時間天氣都好適合我,真係好感恩~ (一離開就開始晴天了)

期待下一次跟沖繩再會!(幾時先去埋最東端呢?)

PS 去完呢個旅行感到我完全忘記晒啲泡菜文。。。

返回第四日行程>>

攀山涉水 Life Well Travelled

日本最南與最西端之旅 - Day 4 狂風橫掃最西端與那國島

又醒又瞓咁輾轉左一晚,又居然退左燒,但個人都係吽吽地,不過已經極感恩。食左早餐就要退房,是日訂左十二點幾去與那國嘅航班。朝早打算去碼頭行下買下手信再坐番急行巴士去機場,在機場又可以行下舖頭同埋好重要-買藥。買完藥朋友仔諗住食定午餐,但我無胃口於是佢就一個人食左。之後仲係頭昏腦漲嘅我俾一個琉球按摩嘅牌吸住左,就上左樓上睇下係咩嚟。

上到去當我猶疑緊係咪值得去,應該唔好嘥錢嘅時候,忽然衝來左兩個西裝友直接入左去,然後兩位按摩師傅都唔得閒了 T_T 間野好得意架,要個客換一件琉球民族服裝,然用琉球手法按壓。失策呀。

與那國島同八重山其他島嶼嘅距離比較遠,反而同台灣仲近。曾經有一段時候佢地想搞獨立然後歸入台灣,除左因為日本政府長期理唔到佢地,亦因為有台商想巨額投資先會呢個古怪動議,最後當然係日本政府強烈反對而不了了之。

其實與那國島以前仲難去過波照間島,因為真係成日好大浪同路途遙遠,所以佢亦有 “渡難”(どなん)呢個別名。宜家有機場可以坐飛機去,因為人唔多所以係用細螺旋槳機,雖然無坐船咁會受波浪影響,但大風都會影響起飛同埋架機咁細,唔早啲買就無位。我地去到閘口都出左強風警告,話班機有可能受到影響。等左一陣話可以飛了,咁大家就慢慢行出停機坪上機。順便講一下,日本國內線係可以由禁區外帶飲品入去,佢有部液體分析機照下就過得 (除非你特登帶啲可疑物品啦)。

去與那國大概只係半小時嘅時間,轉個頭又落機。去到果然見到機場係幾大風下,我地就快快番入去等攞行李。攞左行李就要攞車,都未行到租車櫃位個姨姨已經行左出來等我地,梗係心諗點解個外國人咁耐都未露面,係咪迷路。

佢介紹左一次日本駕駛規則,但最重要係注意動物-因為與那國道路係車同動物共享嘅,不過都好輕易就俾左架車俾我地,可能小島啲人都無咁多戒心,又或者覺得我地都會小心嘅。

臨行佢仲問我地食左飯未,因為已經一點半佢話出面大部分食肆都關左,佢即刻推左我地入機場嘅食堂。本來食堂都關緊但都招呼埋我地,佢話只係得番拉麵有無問題。拉麵好好味呀梗係無問題啦。

呢度都係食八重山拉麵,但感覺上湯底唔同。本來有一款係與那國名產嘅長命草整嘅拉麵,不過見人地都準備關門所以無要求咁多。當我好興奮咁叫左兩碗麵食緊時,我對面那位小姐忽然好陰森咁話,”其實我食左飯架喇。。。” 噢。

食完飯就攞車去Ailand 酒店check in,本來打算擺低行李就出來,但入到房見到比石垣大左五倍再加上尋晚瞓唔到,即刻想攤一兩個鐘。不過時間緊逼,都係出發啦。

酒店好貼心咁俾左張分區手畫地圖,方便我地觀光。與那國島細過石垣島少少,但好多上落坡加上我絕對唔可以吹風,所以都一定要租車。

第一站去左與那國島唯一嘅繁華街 (旺區) -其實只係有島上絕無僅有嘅幾間食店同一間由船公司福島海運經營嘅超市,島上其他大部分地方都係農田同住宅。當我地行行下時,前面有幾個剛放學嘅小學生,其中一個問我,”外國人?” 我當時用面罩遮住自己擋緊風,就點左幾下頭-佢即刻拉住佢啲朋友仔好似見到怪物咁跑走左。。。外國人=外星人?

之後就正式出發環島一周,首先好天真咁沿海邊嘅路行。轉到入一個墓地時前面忽然水浸,被逼折返;後面剛好有架小卡車,佢讓左路俾我地之後chut 一聲就駛過左個水氹,我地驚整壞人地架車,都係行另一條路啦。 14 more words

攀山涉水 Life Well Travelled

日本最西與最南端之旅 - Day 3 上山下海石垣島遊

由於第一日試過搵唔到有車揸,尋日知道可以即日來回時已馬上訂好今日嘅車。食完早餐去到租車地點 (間野日文叫nikoniko, 個網係 https://www.2525r.com/, 好搞鬼) 佢又係一個車房,不過今次係有職員接應。

職員好耐心咁講解啲條款同駕駛規則,特別提左我地一千次唔好超速,佢話佢去過香港坐的士嚇到佢傻,可能因為咁佢覺得香港人一定會超速 XD 同埋撞到死物保險唔包,賠錢會好貴,要特別小心。佢俾地圖我地問我地去邊,仲介紹左邊度有好野食,多謝~

今日先去石垣島最北端一路玩落來,一路揸上去都好多農地同未開發嘅地區,好驚會卡落路邊啲坑。之前在本島試過去啲勁偏僻嘅地方俾樹枝刮到架車,所以好小心好小心。揸左成個鐘,終於到左平久保崎燈台-哇,大風到差啲吹爛度車門。影左兩張相開始落毛毛雨同好大風,我地就好急咁走番上車,連最北端個牌都忘記影。@@

番左落來就去附近嘅明石食堂,係租車店推介嘅。架車個GPS 定左位去旁邊條街,我地搵唔到就落車諗住問人,都未開口個人已經指我去隔離條街 XD 因為叔叔頭先話好出名條隊會排到50米,我地特登早啲來,去到仲有車位,心諗呢度都好偏僻,無咁多人嘅。呢度主打係拉麵,但都有一兩個飯嘅選擇,為食嘅我地當然係又飯又麵咁叫啦。叫左野食一陣就開始滿座,真係好彩聽話早來。個八重山豬軟骨拉麵好好味呀,另外仲叫左吉列豬扒定食,又係好鬆化,果然係名店。但係中途唔知邊度殺出一隻飛滋,係咁在我地檯附近飛,一撥,跌左落麵豉湯!我地已經話俾店員聽佢係飛飛下跌落去但佢地都驚左好耐係咪煲湯有野。。。

有驚無險又食飽上路,出來雨已經更大了,本來想去附近一個隱世平野海灘,見 GPS 無顯示又天色又唔好,就放棄左再落下一個景點-米原海灘。米原海灘係另一個同北浜幾乎齊名嘅靚海灘,雖然天陰但個景都好靚。呢度水流好急,成日有意外,所以呢啲咁嘅天我都唔打算落水。但見到海邊已經有啲珊瑚同有魚就踩左對腳落水-我呢幾日除左日日帶住浮潛呼氣管仲帶住浮潛襪同著住長袖泳衣,雨又停左,所以一下就落左水,玩到濕到上膝頭,成部 Note 8 攞入水影左好多片同相。今次唔加晴天資料圖片了,從下面嘅相同片大家應該估到有幾靚。

上番車有抹乾但都感覺個膝頭陰陰凍。。。年紀大。

海灘之後係班納森林公園,個公園好大,在班納山丘入面,分五個區有好多動植物睇,仲有紅樹林團,但我地要趕後面行程同埋落雨都凍凍地,所以只係去吸左十分鐘森林之氣就走左。 11 more words

攀山涉水 Life Well Travelled

日本最西與最南端之旅 - Day 2 最南端有人島波照間島

講番波照間島呢個地方一日六班高速船來回點解都咁難去到,係因為石垣去波照間水路長期大浪,夏天打風冬天季候風,尤其十二月欠航率係全年最高,取消機會達六成以上,每星期有四到六班貨船但要排隊攞籌 (隨時俾菠蘿 offload)。波照間機場亦荒廢多年重開無期,所以只有呢條去到都未必番到嘅水路。同埋好多網友都話架船開到都一定好顛簸,大家分享晒要揀咩位坐要食暈浪藥甚至聽咩類型音樂,所以尋日特登去左藥房買左暈浪藥。

波照間航道只有安榮觀光經營,通常朝早七點就會公佈當日最早嘅八點半船開唔開到,所以食住早餐等,見到有去程船但下午回程仲未有,就即刻執左萬一要過夜嘅少量行裝,食定暈浪丸去碼頭。去到碼頭雖然咁早都好多人,呢個碼頭幾乎靚過同繁忙過機場,因為八重山所有離島船都係呢度搭。

因為網上訂左飛所以好快俾左錢換左飛,仲有折扣優惠。順便講下其實有幾個島嘅套餐優惠,但因為我地時間有限,只係去波照間島。周圍睇左一陣就快啲上船揀個無咁易暈嘅位-其實架船都偏大,大過我地去愉景灣柏麗灣嗰啲,對於坐慣天星小輪同港外線嘅我地坐邊應該唔太大分別。呢個時候花樣Columbia 又進入我地視線範圍……

開左船都過左差唔到五分鐘先出到個好大嘅港口,但一出左去有位船員先生就出來話個引擊有啲事要折返!!!吓,咁辛苦上到船唔係都去唔到呀,好彩佢話會轉船,咁於是又乖乖地等安排。去到船已經預備好等我地,不過架船就換左細船,見到都覺得會在波濤中飛起嗰隻 @@ 咁細嘅船坐邊都應該差唔多所以無揀坐左個頗前嘅位,但原來……

果然不出所料,細船係拋到機動遊戲咁,本來睇浪都唔錯但睇太耐就有啲攰,不過都好難瞓著,船程大約一個鐘就合埋眼抖下算。接近波照間時越來越大浪,忍多陣……

到了,傳說中嘅星之國!無講波照間因為在南面同埋無光害,夜晚好多星星,尤其以十二月尾到六月可以喺呢度見到嘅南十字星最出名,但因為未到時候同埋冬天都係陰天多所以優先安排希望唔過夜即日來回 (過夜會變 Plan D)。在波照間碼頭諗住去個洗手間再睇地圖安排點行,到所有人俾旅館接走晒或自己走晒我地仲咪摩緊,忽然偷聽到碼頭職員講電話,確認左有五點嘅回程船!多謝!

出到去影左兩張相,見到一個貨櫃前面有幾架單車,即刻衝左埋去睇下係咪臨時租車場-畢竟都擾攘左一陣所有落船嘅人都走晒萬一佢關門走左就大件事。我埋到去個腦可能入左水,話佢知我想租兩架 バイク (bike),店員問我攞駕駛執照,我呆左一下,點解單車要駕駛執照-兩秒之後醒番話佢知係要自転車唔係bike -bike在日文係電單車嘅意思 @@ 搞番啱之後佢問我地要唔要有電嘅單車,其實睇直子插畫嘅時候已經見到佢話好多上落暗斜,我地為左慳錢要左普通單車……

一開車條路已經好斜,差啲瀡番落來;又無校好高低,隻腳係咁卡到後座個架,撞到瘀晒。不過之後慣左就好啲,開始探險~

第一站係先去有日本最一靚景沙灘之稱嘅北浜-好多人會以為係西浜 (包括波照間嘅路牌),因為佢日文係 ニシ (nishi) 浜 -nishi 在大部分人講嘅日文係西咁解,但在琉球嘅方言,呢個字係解北邊嘅意思 (所以佢用左片假名標音,而唔會用平假名);而呢個灘又咁啱在西北邊所以好多人都無發現譯錯,至於點解有啲路牌出現西浜就不得而知了。 29 more words

攀山涉水 Life Well Travelled

日本最西與最南端之旅 - Day 1 石垣島川平灣

出發喇~ 香港直飛石垣早上七點九起飛,四點就爬起身去機場 E_E 去到好彩無發呆因為轉左閘口完全無廣播,安全上機就又瞓左一輪 (基本上呢個旅程我係隨時都瞓得著);大概兩個鐘就到左石垣機場。

石垣機場國際線唔多,我地又無行李,好快就出左國際線terminal。前幾日已經搵左日航幾次 waitlist 呢日去與那國機位都無回音,今日再去問多次-去到國內線大樓對眼馬上吸住左-好多舖頭呀。但要做左正經事先,問完,都係無位,咁正式啟動 Plan C (Plan B 係直去波照間,但班機遲左同埋是日嘅船又取消),出石垣市玩。

去市區有一架急行去離島碼頭,係在我地酒店附近。上左車外面剛好有幾位應該係旅觀光公社嘅女職員在等團友上落車,一有人佢地就打晒鼓彈晒琴咁,好有氣氛。(唔好意思得背面)

與此同時不停有香港人上錯我地架車,或上來問點買交通 pass (包括之後會不停出現嘅花樣Columbia五人組- 因為佢地其中一位著湖水綠Columbia 好搶眼,請容我咁稱呼佢地),令出名準點嘅巴士遲左一分鐘開。

半個鐘好快到左碼頭,一落車,大風過機場好多-完全無預過咁涼,即刻衝左入一間叫做夢乃屋嘅拉麵店。呢間食嘅係八重山拉麵,同沖繩本島有啲似,湯好清同啲麵粗嘅,但八重山比本島更有嚼勁,飽肚啲。兩個吃貨由於太早食早餐,又叫到一檯又飯又麵。呢度有種特別嘅島胡椒叫ヒバーチ(wiki話佢中文名係”假蓽拔” @_@,英文係Balinese long pepper),好香幾好味。 29 more words

攀山涉水 Life Well Travelled